Eksperiencës së Lucien Favre te klubi i Nice i ka ardhur fundi pasditen e sotme. Tekniku zviceran, që mori drejtimin e klubit francez në verën e 2022-shit, nuk arriti të ruajë rezultatet pozitive dhe drejtuesit vendosën ta shkarkojnë.
Lajmin e ka bërë të ditur vetë klubi i Nice në një komunikatë zyrtare, ku sqaron se Favre mbetet një njeri i shtëpisë dhe anëtar i respektuar i klubit, pasi ka lënë gjurmë me punën e bërë në sezonin 2016-2017.
Ndërkohë, përkohësisht skuadra do të stërvitet nga Didier Digard, 36-vjeçar, që u afrua më herët në skuadër dhe punoi si trajner i skuadrës së dytë, ndërsa tani do të marrë drejtimin e ekipit kryesor.
Bashkë me trajnerin Favre, nga Nice largohet edhe ndihmësi i tij, Christophe Moulin, i cili zëvendësoi Arjan Peçon në tetorin e vitit të kaluar.