Pas pushimit në fundjavë për shkak të shtyrjes së El Clasicos ndaj Realit të Madridit, Barcelona zbret në fushë mbrëmjen e kësaj të marte teksa pret në Camp Nou, Real Valladolidin e fenomenit Ronaldo. Barça do të kërkojë të rimarrë kreun e La Ligas dhe fitorja ndaj skuadrës së Sergio Gonzales parashikohet të jetë një formalitet për Lionel Messin me shokë, me argjentinasin që do të tentojë të realizojë dygolëshin e parë sezonal në këtë sfidë pasi pak nga pak Messi duhet të kompensojë me golat e tij mungesën në 4 javët e para të La Ligas për shkak dëmtimi. Barcelona-Real Valladolid do të nisë në orën 21:15 me blaugranat që do të tentojnë të regjistrojnë fitoren e 7-të radhazi në të gjitha kompeticionet dhe të 5-ën rresht në La Liga, edhe pse Real Valladolid është një kundërshtar delikat pasi skuadra me president fenomenin Ronaldo e ka nisur mirë kampionatin dhe vitin e kaluar në të dyja ndeshjes është mposhtur minimalisht 1-0 nga skuadra e Ernesto Valverdes. Java e 11-të e La Ligas, megjithatë do të nisë në orën 19:00 me Atleticon e Madridit që sfidojë në transfertën baske Deportivo Alaves, një ndeshje që skuadra e Simeones duhet ta fitojë me çdo kusht nëse nuk dëshiron të humbasë kontaktet me kreun.
