Java e 26-të e IPKO Superligës së Kosovës nis këtë të mërkurë me tre sfida shumë interesante që do të transmetohen në ekranin e Supersport. Takime të lehta në letër për Dritën dhe Gjilanin. Kryesuesit e kampionatit do të sfidojnë në transfertë Vushtrinë që për momentin vetëm matematika e mban në lojë për qëndrimin në elitë. Fitorja për Dritën në këtë sfidë që parashikohet të jetë thjeshtë një formalitet. Të thjeshtë pritet ta ketë edhe Gjilani që në Klinë sfidon skuadrën e vendit të fundit, Dukagjinin. Ndërkohë ditën e sotme luhet edhe një sfidë direkte në garën për mbijetesë mes Trepça ’89 dhe Flamurtarit. Skuadra mitrovicase nëse sezonin e ardhshëm nuk dëshiron ta shohë veten në ligën e parë, duhet medoemos ta fitojë këtë sfidë pasi diferenca me kryeqytetasit në klasifikim është 5 pikë.
