Bylisi, pavarësisht ecurisë mbresëlënëse në pjesën e parë të sezonit, ishte skuadra që kishte nevojë më shumë për përforcime për të përballuar me sukses kampionatin. Pikërisht në kuadër të merkatos së janarit, drejtuesit e ekipit ballshiot kanë zyrtarizuar dy afrime shumë të rëndësishme në ato role ku trajneri Dovedan kishte kërkuar përforcime.
I pari është 23-vjeçari Visente de Paula Mercedes, mbrojtësin brazilian të linjës së djathtë, që në dy sezonet e fundit ka qenë pjesë e Lvivit në Ukrainë.
I dyti është argjentinasi Marselo Gonzales, që ka spikatur me ekipin e Orikut në Kategorinë e Parë. Një lojtar me perspektivë që ka bindur trajnerin Dovedan por edhe projektin e klubit.
Por këta dy lojtarë nuk do të jenë afrimet e vetme të merkatos së janarit, pasi drejtuesit e Bylisit po punojnë për të tjerë elementë cilësorë, që do të shtonin cilësinë në skuadër.