Mision i realizuar me sukses. Kukësi nuk gabon dy herë radhazi. Pasi dështaun sezonin e kaluar për të kaluar qoftë edhe një tur në Uefa Champions League, këtë herë verilindorët ja dolën. Me shumë fat, falë një gol në fushë kundërshtare i ardhur 6 minuta nga fundi i kohës së rregullt nga gjeorgjiani Iralki Dzaria, Kukësi barazoi 1-1 në transfertën malteze ndaj kampionëve të Maltës, Valletta duke avancuar në ruandin e dytë kualifikues të UEFA Champions League, pasi ndeshja e parë në Shkodër kishte përfunduar në barazim pa gola. Nisi në mënyrën më të mirë aventura e dytë e Armando Cungut në stolin e Kukësit edhe pse loja e nënkampionëve të Shqipërisë në kryeqytetin e Maltës la shumë për të dëshiruar.
Vendasit e dominuan takimin aq sa kompanitë e basteve pas pjesës së parë e quanin një mision të kryer kualifikimin e Vallettas, por reagimi i Kukësit erdhi në fraksionin e dytë me Cungun që guxoi duke aktivizuar boshnjakun Harba, kroatin Spehar dhe Valon E’themin të cilët i dhanë më shumë freski sulmit. Pas shumë përpjekjeve Valletta zhbllokoi shifrat me italianin Piciollo që në miunutën e 67-të mposhti Frashërin. Por në goditjen e parë në portë Kukësi, barazoi rezultatin falë Dzarias që shfrytëzoi asistin e Rrumbullakut për t’i dhënë kualifikimin Kukësit, një kualifikim që vlen mijëra euro për arkat e klubit verilindor. Vangjel Zguro mori kartonin e dytë të verdhë edhe pse ishte i ulur në stol duke u larguar nga fusha por pavarsisht edhe 5 minutave shtesë që akordoi gjyqtari, Kukësi rezistoi dhe në fund verilindorët u larguan nga Malta shumë të lumtur. Tashmë Kukësi mendon për turin e dytë të Championsit aty ku me shumë gjasa do të ketë përballë Qarabagun ku luan Ansi Agolli, ndërsa me kualifikimin ndaj Valletas verilindorët kanë siguruar minimalisht pjesëmarrjen në turin e tretë kualifikues të Europa Leagues edhe nëse eliminohen nga turi i dytë në Champions League.