Conference League

Një karrierë mes Feyenoord dhe Romës, mbrojtësi sfidon “familjen e vjetër” në Air Albania

Më datë 25 maj, Tirana dhe stadiumi Air Albania mirëpresin finalen e Conference League mes Romës dhe Feyenoord. Vëmendja dhe interesi është tejet i lartë ndërsa me qindra mijëra tifozë do të pushtojnë rrugët e kryeqytetit shqiptar. Sakaq, finalja mes italianëve dhe holandezëve mbart edhe një histori të veçantë për futbollistin Rick Karsdrop.

Mbrojtësi anësor është pjesë e Romës aktualisht, por karriera e tij është e lidhur ngushtë edhe me Feyenoord, klubi i cili i dha mundësinë e parë për të luajtur në futbollin profesionist, madje duke e bërë pjesë të tyre që në moshën 9-vjeçare. Me Roterdamasit, Karsdrop koleksionoi 101 paraqitje dhe deri me tani është klubi i vetëm me të cilët ka fituar tituj. Më pas në vitin 2017, pas një sezoni të kaluar me dëmtime të shumta, Roma mbërrin dhe i dhuron besim.

Megjithatë, teksa debuton në tetor më datë 25 në një ndeshje të fituar kundër Crotones, në minutat e fundit, Karsdrop kërkon zëvendësim për një problem në gju. Dhe, rezultati i analizave është për të vënë “duart në kokë”; futbollisti këput ligamentin.

Kështu, sezoni i tij me Romën nis dhe mbaron për vetëm 82 minuta. Në vazhdim të aventurës me Romën, e rrethon një dyshim i madh. Por, në ndihmë i vjen sërish shtëpia e tij, Feyenoord. Mbrojtësi huazohet për një sezon te Roterdamasit dhe rigjen formën.

Rikthehet në Romë për meritë të Fonsecës dhe zhvillon sezonin e parë të vërtetë si protagonist duke koleksionuar 45 paraqitje, një gol dhe gjashtë asiste. Jo keq për dikë që disa muaj më parë e kishte karrierën në dyshim.

Ndërkaq, në karrierën e Karsdrop duket se portugezët i sjellin fat, pasi edhe me Mourinhon, holandezi shkëlqen. Tashmë, Karsdrop ka mundësinë të kurorëzojë me një trofe aventurën e tij me Romën, por si kundërshtar gjen pikërisht familjen e tij të vjetër Feyenoord. Epo, futbolli ndonjëherë di vërtet të tregohet i pamëshirshëm ndërsa në stadiumin Air Albania, Karsdrop duhet të tregohet një profesionist i vërtetë dhe pavarësisht se për cilin klub i rreh zemra, do të mundohet të japë më të mirën për fanellën që përfaqëson aktualisht.

 

Eventet Sportive në SuperSport

Të Fundit

EVENTET NË SUPERSPORT

To Top
Evolve Web Agency Evolve Web Agency