Prishtina përforcohet me një tjetër element cilësor në prag të kampionatit të ri. Klubi bardhekaltër ka zyrtarizuar nëpërmjet një postimi në rrjetet sociale bashkëpunimin me Lumbard Dellovën, pjesëtarin e Përfaqësueses së Kosovës U-21. Qendërmbrojtësi i lindur në Krushë dhe ish-anëtari i Lirisë së Prizrenit, i transferuar tek Hajduku para dy vitesh, konsiderohet vlerë e shtuar në organikën e kryeqytetasve
Dellova, 21 vjeç, i lindur më 01.01.1999, ka qenë pjesë e rregullt e skuadrës së parë të Hajduk Splitit. Me Hajdukun II, ka zhvilluar pothuajse të gjitha ndeshjet në Ligën e Parë.
“Trnasferimin te Prishtina e konsideroj si trampolinë, duke pasur parasysh se tek Hajduku nuk kisha minuta aq sa doja, megjithëse isha në 18-she në shumicën e ndeshjeve. Mua më duhen ndeshje në këmbët e mia, jam futbollist i ri dhe, duke besuar shumë se me Prishtinën do të jetë ndihmë e dyanshme, vendosa pa hezitim të jem pjesë e skuadrës.
Shpresojmë t’i arrijmë objektivat. Klubi nuk ka ndryshuar aq shumë prej kohës kur debutova me Lirinë përballë Prishtrinës, nën drejtimin e trajnerit Bledi Shkëmbi. Të them të drejtën, mezi pres të paraqitem këtu, në “Fadil Vokrri”, ku para ca ditësh edhe debutova në stadiumin e rinovuar kundër Anglisë U-21”.
Pas Dellovës Prishtina ka zyrtarizuar edhe portierin kroat, Ivan Jelic, 1.98 metra i gjatë. 22-vjeçari ka qenë pjesë e disa skuadrave në Kroaci, ku spikat RNK Split, ndërsa së fundi ka mbrojtur portën e NK Krsko.