Gentian Mezani është zyrtarisht trajner i Gjilanit në Ipko Superligën e Kosovës. 39-vjeçari nga Vlora udhëtoi të mërkurën drejt Kosovës, ku firmosi kontratën me ekipin e tij. Nuk bëhen të ditura detajet e marrëveshjes, por besohet se kontrata është 2-vjeçare.
Ndërkohë Alban Hyseni, do t’i rikthehet pozicionit të tij të mëparshëm si ndihmëstrajner.
Gentian Mezani karrierën si trajner e ka nisur pikërisht në vendin e tij të lindjes, Vlorë, me moshat e Flamurtarit, për të marrë në vitin 2016 edhe zyrtarisht detyrën e shefit të shtabit teknik në ekipin e parë të kësaj skuadre dhe duke vazhduar të punojë deri në fundin e edicionit 2017.
Pasi drejtoi Flamurtarin deri në fundin e edicionit Mezani i ndau rrugët me ekipin e fëmijërisë, derisa nga viti 2017 u bë pjesë e Laçit, ekip me të cilin shkroi historinë.
Mezani drejtoi Laçin për 31 ndeshje, duke e çuar deri në në finalen e Kupës së Shqipërisë (humbi 1-0 me Skënderbeun) dhe arriti të siguronte pozitën e katërt dhe pjesëmarrjen ne Europë për ekipin kurbinas.
Mezani në edicionin e fundit drejtoi ekipin e Luftëtarit të Gjirokastrës deri në janarin e vitit 2019.