Quhet Luka Joviç dhe shumë njerëz nuk e kanë dëgjuar ende emrin e tij, por nëse shifrat e regjistruara prej tij në fushën e lojës, do t’i bëjnë pa dyshim të gjithë kuriozë.
Sulmuesi i lindur në Bosnjë dhe Herzegovinë, por me kombësi serbe, pasi luajti vetëm një minutë në sfidën Brazil-Serbi, gjatë Botërorit “Rusi 2018”, në verë u transferua nga Benfica te Eintrachti i Frankfurtit, kundrejt një vlere prej 200 mijë eurosh për huazim dhe të drejtë blerjeje për 12 milionë euro.
Dy javët e para i shikon nga stoli dhe më pas fillon të aktivizohet në momentet e fundit të ndeshjeve, por gradualisht u shndërrua në një titullar dhe në 20 ndeshje në Bundesligë, ka arritur të shënojë 14 gola dhe të asistojë 4 të tjerë.
Shifra impresionuese edhe në Europa League, ku sulmuesi serb ia ka dalë të shënojë 6 gola dhe të asistojë një tjetër, ndërsa kaq ka mjaftuar që të tërheqë vëmendjen e Barcelonës dhe shumë klubeve të Premier Leagues.
Tashmë të gjithë ata që kanë kuriozitet të ndjekin dhe vlerësojnë performancat e sulmuesit 21-vjeçar serb, do të kenë këtë mundësi në ndeshjet e 7 dhe 14 Marsit, kur Eintrachti i Frankfurtit të përballet me Interin, në fazën e 1/8-ave të Europa Leagues.
Nga ana tjetër, Skriniar me shokë duhet të bëjnë kujdes me markimin e sulmuesit, i cili krahasohet me Radamel Falcaon, pasi rrezikojnë të bëjnë një figurë të shëmtuar dhe të shohin eliminimin nga Europa League.