Nedim Bajrami ishte protagonist me Empolin në mbrëmjen e së shtunës në Serie A, teksa realizoi në disfatën 3-1 ndaj Milanit. Mesfushori i Shqipërisë ekzekutoi në mënyrë të shkëlqyer një goditje dënimi nga një distancë e konsiderueshme duke barazuar përkohësisht rezultatin e ndeshjes.
23-vjeçari konfirmohet një personazh i rëndësishëm në organikën e Empolit ndërsa edhe pse u aktivizua në minutën e 59-të të pjesës së dytë, sërish nga Eurosport, paraqitja e Bajramit është vlerësuar me notën shtatë, një nga më të lartat e skuadrës së drejtuar nga trajneri Paolo Zanetti.
Bajrami, nota 7- “Ka pak faj në shpërdorimin e dy rasteve duke e dërguar topin jashtë kuadratit. Megjithatë, “fajin” e shlyen me një goditje dënimi shumë inteligjente duke konfirmuar kualitetet që zotëron. Është një Top-Player i skuadrës së Empolit”, shkruan Eurosport për paraqitjen e Bajramit ndaj Milanit.
