Fjalët të motivojnë, por ato kanë dyfish vlerë kur i thotë një nga legjendat e basketbollit, si Dirk Nowitzki. Gjermani foli fjalët më të mira për të riun Luka Doncic, me të cilin do të jetë shok ekipi tek Dallas Mavericks, duke nisur që nga ky sezon:
“Nuk u kam besuar syve. Mendoj se nuk kam parë asnjë lojtar të tillë, të jetë kaq i zoti në moshën 19-20-vjeçare. Arrin të luajë në mënyrë të mrekullueshme “pick and roll”, bën gjithmonë veprimin e duhur, në kohën e duhur. Është shumë i qetë, vizionin e lojës si ai e kam parë te lojtarë të kalibrit të Chris Paul”.
Nowitzki është një nga gjashtë lojtarët e vetëm që ka arritur kuotën e 30.000 pikëve në karrierë e me plot gojë mund të thuhet se është lojtari europian më i suksesshëm në historinë e NBA. Gjermani kujton se se edhe ai ka pasur vështirësi në vitin e parë në Amerikë, gjë që mund të ndodhë edhe me 19-vjeçarin:
“Nuk është e lehtë të përshtatesh kur vjen nga një vend tjetër. Çdo gjë është e re. Niveli, trajnerët apo stili i lojës. Viti im i parë ishte shumë i vështirë, por këtu në Dallas ne do ta ndihmojmë Lukan në çdo mënyrë, që ai të shprehë më së miri lojën e tij.”
Doncic njihet si një nga talentët europianë më të mirë të të gjitha kohërave. Shpeshherë është krahasuar me legjendën kroate, Dražen Petrovic. Në sezonin e kaluar, slloveni ishte pjesë e Realit të Madridit, ku arriti të fitonte kampionatin dhe Euroleague, madje arriti të shpallej MVP i kompeticionit më madhor evropian për klube.