Pozitiviteti i Romela Begajt në kampionatin botëror në Kaliforni, ku peshëngritësja shqiptare fitoi medalje ari në stilin e shkëputjes dhe argjend në dygarësh ishte pika që derdhi gotën. Pas skandaleve të një pas njëshme të dopingut në shtangën shqiptare, më në fund Elez Gjoza dha dorëheqjen nga posti i presidentit të Federatës. Vendimi lidhet ngushtë me pozitivitetin e Begajt, që pasi regjistroi paraqitjen më të mirë në arenën botërore, dështoi në testet e anti-dopingut, ku rezultoi se kishte përdorur stanozolol, substancë për të cilën pak kohë më parë ishte pezulluar për dy vjet nga aktiviteti. Gjoza ka qenë prej vitesh një personazh kontrovers dhe gjatë mandateve të tij, peshëngritja shqiptare u kthye nga sporti më i suksesshëm në vend, në sportin e skandaleve. Opinioni, por edhe vetë sportistët dhe trajnerët kërkuan dorëheqjen e tij nga drejtimi i federatës në fund të vitit 2014, kur shtanga shqiptare u gjunjëzua nga dopingu i tre sportistëve, mes të cilëve pikërisht Romela Begaj dhe Daniel Godelli.
Pas largimit të Elez Gjozës, posti i presidentit të Federatës Shqiptare të Peshëngritjes do të mbahet përkohësisht nga Gudar Beqiraj. Ish-kreu i Akademisë së Shkencave do të jetë në detyrë deri në momentin kur të përcaktohet zhvillimi i Asamblesë së Jashtëzakonshme të FSHP-së, ku do të zgjidhet edhe drejtuesi i ri i peshëngritjes shqiptare.
