Xabi Alonso është gati të nisë aventurën e parë si trajner në Bundesliga. Ish-mesfushori spanjoll ka firmosur me Bayer Leverkusen, ekip që po vuan në këtë sezon. “Aspirinat” renditen në vendin e parafundit në kampionatin gjerman, ndërkohë që nuk kanë marrë asnjë pikë në tre ndeshjet e para në Champions League.
Alonso është entuziast, beson te kualiteti i ekipit dhe tregon se çfarë futbolli do të shijojnë tifozët gjermanë nga skuadra e tij. “Dua të luajmë një futboll modern, që do të thotë dominim dhe intensitet, në lojën me dhe pa top. Nuk e shikoj renditjen, mua më intereson puna e përditshme.
Rrëzimi nga Kategoria? As më kalon nëpër mendje. Kam besim të madh te lojtarët e pranishëm, të cilët kanë bërë shumë mirë ndër vite, thjesht duhet t’i marrim ndeshjet një nga një”, deklaroi 40-vjeçari.
Alonso ka firmosur deri në vitin 2024 me klubin gjerman. Gjatë karrierës si futbollist ai fitoi trofe me Liverpoolin, Real Madrid dhe Bayern Munchen, teksa “pushtoi” botën me Spanjën, duke fituar një Kupë Bote dhe dy Europiane.
Tani shpreson të nisë me fitore aventurën në pankinën e Bayer Leverkusen, që të shtunën pret në fushën e vet “mbretërorët” e Schalke 04.