Këtë herë nuk ka mrekulli për Claudio Ranierin, aventura e të cilit me Watford ka përfunduar pas pak më shumë se tre muajsh. I thirrur për të marrë vendin e Xisco Munoz në klubin londinez, tekniku i njohur italian nuk ia ka dalë të rikthejë skuadrën te rezultatet pozitive.
Vetëm 7 pikë të grumbulluara që prej 4 tetorit kur mori drejtimin e Watfordit dhe sidomos humbja e fundit 0-3 ndaj Norwichit, një rival direkt në garën për mbijetesë, kanë bërë që familja Pozzo t’i komunikojë shkarkimin.
Lajmin e bëjnë të ditur mediat angleze, të cilat theksojnë se në orët e ardhshme pritet jo vetëm zyrtarizimi i shkarkimit të Ranierit, por edhe emërimi i trajnerit të ri, që do të marrë drejtimin e klubit me misionin për ta mbajtur në elitën e futbollit anglez.