Chelsea doli pa pikë nga sfida shtëpiake ndaj Manchester City. Goli i Riyad Mahrez i dhuroi pikët maksimale kampionëve në fuqi, ndërkohë që në krahun tjetër trajneri Graham Potter humbi dy lojtarë të tjerë për shkaqe dëmtimesh.
Raheem Sterling u largua nga fusha në minutën e pestë për shkak të problemeve në gju, ndërkohë që trajneri i Chelsea u detyrua të kryente një tjetër zëvendësim 17 minuta më vonë pas dëmtimit të Christian Pulisic.
Skuadra londineze po vuan në Premier League. Chelsea renditet në vendin e dhjete me 25 pikë, dhjetë larg zonës Champions, ndërkohë që në kompeticionin më të rëndësishëm për klube do të sfidojë Dortmundin për një biletë në çerekfinale.
Numri i lojtarëve të dëmtuar ka shkuar në dhjetë, situatë që shqetëson shumë trajnerin Potter dhe tifozët. Sterling-Pulisic u bashkohen në infermieri emrave si Armando Broja, Ben Chilwell, Wesley Fofana, Reece James, Ngolo Kante, Ruben Loftus-Cheek, Edouard Mendy dhe Mason Mount.