Po bëhet gjithnjë e më shqetësues numri i lartë i futbollistëve të cilët po shfaqin probleme me zemrën. Mjafton të përmendim rastet e Eriksen, Aguero, Alphonso Davies të Bayern apo edhe shumë lojtarëve të tjerë që nuk janë në qendër të vëmendjes, siç ishte rasti i Ousmane Coulibaly në Katar i cili shpëtoi falë ndërhyrjes së shpejtë të James Rodriguez.
Sakaq, i fundit që iu shtua listës së futbollistëve me probleme kardiake është një tjetër emër i njohur. Fjala është për Pierre-Emerick Aubameyang, i cili është ndaluar të zbresë në fushë me kombëtaren e Gabonit në ndeshjen kundër Ganës në Kupën e Afrikës.
Stafi mjekësor i gabonezëve ka pikasur problemin teksa sulmuesi i Arsenal sapo është shëruar nga COVID-19 dhe ka paqartësi nëse ky problem është një pasojë e virusit.
Por, te Gaboni nuk është vetëm Aubameyang pasi edhe Lemina e Axel Meye shfaqën të njëjtën diagnozë dhe po ashtu sapo ishin rikuperuar nga COVID.
