Karim Benzema pati durim, priti momentin e tij dhe në moshën 34-vjeçare ia doli të fitojë për herë të parë në karrierë Topin e Artë. Goleadori francez triumfoi përballë emrave si Sadio Mane, Kevin De Bruyne, Robert Lewandowski dhe Momo Salah, duke e merituar çmimin prestigjioz.
Jose Mourinho e njeh mirë, ai punoi për tri vite me të te Reali (2010-2013). Në një prononcim për L’Equipe, trajneri i Romës zbuloi raportin me sulmuesin dhe tregoi pikat e tij më të forta që e dërguan në realizimin e një ëndrre të kahershme.
“Karim është një djalë fantastik, ai ka një personalitet të madh. Është një lojtar skuadre, ai nuk është i fiksuar pas vetes, pas fitimit të Topit të Artë apo që të shënojë më shumë se A, B ose C.
Ai është një futbollist që bën kaq shumë për skuadrën, deri në pikën ku Topi i Artë është një pasojë e natyrshme. Fiksimi i tij i vetëm nuk lidhet me gjërat personale por vetëm me skuadrën”, deklaroi “Special One”.
