Connect with us

Hi, what are you looking for?

Kategoria Superiore

Laçi luan, por Kukësi fiton, Flamurtari-Teuta ndahen ne paqe

Kukësi është rikthyer të fitojë pas 4 takimesh, teksa ka mposhtur Laçin me rezultatin minimal 0-1. 90-minutëshi i parë i javës së 13 të Superligës, ka qenë vërtetë spektakolar dhe protagonist kanë qenë laçjanët e Gentian Mezanit, që zhvilluan një takim mjaft intensive. Vendasit dominuan totalisht sfidën dhe bënë gjithçka në perfeksion, përveç atij më të rëndësishmit, golit. Nga ana tjetër, Kukësi u mundua të menaxhojë avantazhin e shpejtë, ndërsa tentonte të sulmonte herë pas here me kundërsulm.

Skuadra e Milinkoviçit gjeti menjëherë avantazhin, me anë të kapitenit Shameti, në minutën e 3-të. Gjirokastriti shfrytëzoi më së miri një krosim të ardhur në zonë nga këndi, dhe pasi i shpëtoi mbulimit të kundërshtarit, goditi me kokë dhe gjeti rrjetën e portierit Selmani. Ky gol e ndezi sfidën, me vendasit që u hodhën në sulm, në kërkim të golit të barazimit dhe veri-lindorët që kundërsulmonin rrezikshëm. Laçjanët krijojnë disa mundësi të mira, ndërsa në minutat shtesë të pjesës së parë, kanë rastin më të mirë për të barazuar, por braziliani Ekskerda gjuan jashtë penalltinë e akorduar nga kryesori Meta.

Edhe pjesa e dytë ka të njëjtën tablo, me skuadrën e Mezanit që sulmon pareshtur, ndërsa kuksianët kundërsulmojnë shpejt. Portieri Koliçi u bë disa herë vendimtar për skuadrën e tij, ndërsa në krahun tjetër, Selmani ndali mrekullisht një goditje të sulmuesit Guri. Në minutat e fundit, heroi i takimit, Shameti, për pak sa nuk ndëshkoi skuadrën e tij, pasi devijoi tmerrësisht keq një top të ardhur në zonë, që për pak përfundoi në rrjetën e Koliçit.

E nëse në fushë u luajt një takim spektakolar, nga ata që rrallë i shohim në Superligë, në shkallët e stadiumit u vu re një sjellje krejtësisht e papranueshme dhe për t’u dënuar, e tifozëve laçjanë. Krahas të sharave në kor, që janë në modë në stadiumet shqiptare, tifozët vendas nuk u kursyen as me hedhjen e sendeve në fushë, teksa fillimisht goditën mbrojtësin e djathtë të Kukësit, Bujar Idrizin dhe më pas sulmuesin brazilian Elton Kale. Këto veprime pritet t’i kushtojnë rëndë skuadrës së Laçit, që rrezikon të luajë disa takime pa praninë e tifozërisë.

Me këtë fitore, Kukësi merr përkohësisht vendin e dytë, në pritje të takimit mes Flamurtarit dhe Teutës, që do të startojë në orën 17:00 dhe do të transmetohet në Supersport 3.

Teuta rezultoi “kockë” e fortë për Flamurtarin në takimin e luajtur në Vlorë, që përfundoi në barazim pa gola. Skuadra e Gugash Maganit rezistoi deri në fund, duke marrë një pikë me mjaft vlerë në këtë transfertë të vështirë, ndërsa për “kuqezinjtë” ishte një rezultat zhgënjyes, pasi detyrohen t’i lënë vendin e dytë Kukësit, që pas fitores me Laçin ka grumbulluar një pikë më shumë.

Flamurtari e nisi ndeshjen me sulmuesin kryesor Bushic në stolin e rezervave, pasi kroati nuk ishte riaftësuar plotësisht nga një dëmtim i pësuar në ndeshjen paraardhëse. Gjithsesi, Duro e hodhi në fushë në minutat e fundit, por pa mundur ta bënte diferencën. Pak para se të mbyllej koha e rregullt vlonjatët pretenduan se topi e kishte kaluar vijën fatale, pasi i shpëtoi për një moment Kastratit nga duart, por për gjyqtarët loja duhej të vazhdonte.

 

 

Lajme të tjera

Futboll

Maroku po përgatitet për të ndërtuar stadiumin më të madh në botë. Bëhet fjalë për një impiant futuristik, që dhe do të jetë ndër...

Kombëtare

Nga Stokholmi në Madrid. Trajneri Sylvinho nuk humb kohë aspak dhe fill pas miqësores Suedi-Shqipëri, ka fluturuar drejt kryeqytetit spanjoll për të ndjekur live...

Legjionarët

Napoli i dashuruar me shqiptarët. Pas Amir Rrahmanit, që është shndërruar në një shtyllë të mbrojtjes, klubi napolitan synon të sjellë në “Diego Armando...

Kombëtare

Armando Broja do të jetë zgjedhja e parë për Europianin. Mendon kështu gazetari dhe komentatori i mirënjohur, Ylli Aga, që në emisionin “Kuqezi” në...