Sebastiano Esposito u huazua nga Interi te Spal verën e kaluar për të pasur më shumë mundësi aktivizimi, por duket se kjo nuk ka ndodhur dhe gjatë muajit janar mund të ndërrojë sërish skuadër.
Me 10 ndeshje të luajtura, për një total prej 470 minutash, sulmuesi i talentuar ka shënuar vetëm një gol dhe së fundi është harruar në pankinë nga trajneri i Spalit, ndaj bashkë me Interin po vlerësojnë mundësinë e ndërprerjes së bashkëpunimit.
Për Espositon janë treguar të gatshme ta marrin në huazim disa klube të Serisë B, por edhe të tjera nga Seria A, ndaj zikaltrit dhe menaxheri i tij po marrin në konsideratë të gjithë mundësitë, ndërsa në Itali këmbëngulin se gjasat më të mëdha janë që sulmuesi t’i bashkohet Brescias.
Sebastiano Esposito debutoi me zikaltrit sezonin e kaluar nën drejtimin e Antonio Contes dhe luajti disa ndeshje, duke shënuar madje edhe gol me fanellën e Interit, ndërsa për vetë moshën, cilësohet si një nga sulmuesit më premtues në Itali.