Ndeshja Aston Villa – Newcastle, e programuar për t’u zhvilluar këtë të premte në “Villa Pak” është shtyrë për një afat për pacaktuar. Shkak është bërë koronavirusi, që ka prekur një numër të madh futbollistësh të “qymyrxhinjve”.
Deri tani janë raportuar 9 futbollistë pozitivë ndaj koronavirusit, ndërsa klubi i Newcastle ka ndërprerë edhe stërvitjen, në pritje të tamponëve të radhës, ku do të shihet nëse ka të tjerë të infektuar.
Vendimi për shtyrjen e ndeshjes është komunikuar pasditen e sotme nga liga angleze, e cila ka theksuar se gjithçka është bërë pas kërkesës së klubit të Newcastle, që nuk po stërvitet këto ditë.
Nga ana tjetër edhe klubi i Aston Villës ka mirëkuptuar situatën në të cilën ndodhen “qymyrxhinjtë” dhe kanë dhënë miratimin për shtyrjen e ndeshjes, e cila bëhet kështu takimi i parë i sezonit që shtyhet për shkak të koronavirusit.
