Lionel Messi mbeti shumë i zhgënjyer nga vendimi i drejtuesve të Barcelonës për të larguar Luis Suarezin, mikun e tij të madh. Por ka një mënyrë për ta parë “Pleshtin” sërish në një skuadër me uruguajanin. Presidenti i Atleticos së Madridit, Enrique Cerezo, i bën ftesë 6 herë fituesit të Topit të Artë t’u bashkohet “Los Colchoneros”. Sigurisht, diçka e tillë mund të ndodhë pas një viti.
“Në jetë, nëse doni diçka… Nëse Leo Messi dëshiron të luajë me Luis Suarezin, i them atë shprehjen e ëmbëlsirave: Lëre të kthehet në shtëpi për Krishtlindje! Me dëshirë, gjithçka është e mundur”, – nënvizoi Cerezo për “Cadena Cope”.
Pavarësisht zhurmës së madhe të krijuar në shtëpinë e Barcelonës gjatë javëve të fundit, Cerezo i doli në krah homologun e tij Josep Maria Bartomeu:
“Nënshkrimi i Suarezit shkoi në mënyrë perfekte. Bartomeu është një mik i mirë dhe një president i shkëlqyeshëm. Për momentin, gjërat nuk po shkojnë mirë te Barcelona, por ai ka vepruar ashtu siç është dashur të veprojë, asgjë tjetër nuk ka ndodhur. Nënshkrimi nuk ishte i vështirë, Suarez po luan aty ku dëshironte të luante”.
