Ofertë tunduese për kapitenin e Milanit, klubi i Premier League “parakalon” Lazion
Alessio Romagnoli është një nga lojtarët që pritet të largohet nga Milani. Kapiteni e ka humbur postin e titullarit te kampionët e Italisë. Lazio është e interesuar prej kohësh për shërbimet e qendërmbrojtësit italian, të cilit i ka përfunduar kontrata me kuqezinjtë.
Drejtori sportiv i klubit bardhekaltër, Igli Tare po bisedon me drejtuesit e Milanit dhe agjentin e Romagnolit, por një klub i Premier League është futur në garë. Lazio i ofroi 2.8 milionë euro në sezon 27-vjeçarit, por Sky Sport Italia raporton se një klub ishullor ka ofertë më të mirë për të.
Fulham, që u rikthye në Premier League dhe që është i interesuar edhe për Thomas Strakoshën, ka gati nië pagë sezonale prej 4 milionë eurosh për lojtarin e prapavijës. 19 ndeshje zhvilloi Romagnoli sezonin e fundit me Milanin.
Dëshira e tij është të mbetet në Serie A dhe të vijojë karrierën në Italia, por klubi londinez i ofron më tepër para. Lojtari po mendohet, teksa tani pritet reagimi i Lazios.
Për kapitenin e Milanit ka interesim edhe nga Aston Villa e Newcastle, por drejtuesit e Fulham i kanë bërë propozim konkret dhe për momentin ndodhen në avantazh ndaj rivalëve.
TESTONI NJOHURITË TUAJA RRETH PREMIER LEAGUE
QUIZ/ Premier League 2021-2022 – Sa mirë e kujtoni sezonin që sapo u mbyll?
