Arbër Zeneli iu nënshtrua me sukses ndërhyrjes kirurgjikale në gju, pas dëmtimit të rëndë që pësoi në sfidën me Malin e Zi.
24-vjeçari, fatkeqësisht kishte këputur ligamentet e gjurit të djathtë, ndaj ishte e domosdoshme që të operohej. Tashmë futbollistin e Reims e pret një periudhë e gjatë riaftësimi për t’u kthyer sa më parë në fushat e blerta.
Sulmuesi u është drejtuar përmes rrjeteve sociale të gjithë fansave të tij, duke i falënderuar për përkrahjen që i kishin dhënë gjatë gjithë kohës.
“Operacioni shkoi mirë, fjalët tuaja të mira dhe përkrahja do të më kthejnë më të fortë se kurrë. AZ17 dhe AZ10 po rimbushen”, – ka shkruar ai ndër të tjerash në llogarinë personale në Instagram.
Sipas parashikimeve, Zeneli do të mungojë nga shtatë deri nëntë muaj.
