Transmetimet e së premtes në SuperSport të dedikuara thuajse tërësisht për futbollin mbarëshqiptar. Sigurisht që vëmendjen kryesore e merr derbi i kryeqytetit të Shqipërisë, Tirana-Partizani, por në ekranin e SuperSport do të përcillen drejtpërdrejt emocionet e tri sfidave të sotme të IPKO Superligës së Kosovës. Tri përballje mjaft interesante, të gjitha në orë 13:30, ku luhet përgjithësisht për t’iu larguar zonës së rënies nga kategoria.
Në Gjilan skuadra e Dritës, me shumë ulje-ngritje dhe ndryshime në pankinë në këtë sezon, pret Drenicën, në një sfidë ku fitoja për vendasit është detyrim. “Intelektualëve” ua imponon suksesin renditje, pasi kanë 26 pikë, vetëm një më shumë se zonë play off. Në fakt, edhe Drenica nuk është në një pozicion më të mirë, pasi diferenca prej vetëm 1 pikë (27) nuk do të thotë asgjë, ose më saktë konsiderohet e papërfillshme.
Surpriza e ndeshjeve të para, pas pauzës dimërore, Ballkani, do të tentojë fitoren e radhës në fushën e Ferizajt. Një ndeshje që për vendasit duhet fituar patjetër, ndryshe mbijetesa do të shndërrohej në një mision shumë të vështirë për t’u arritur.
Tjetër ndeshje interesante do të luhet në Prizren, aty ku Liria do të presë Gjilanin, me synimin e vetëm fitoren. Prizrenasit kanë pësuar tri humbje radhazi në IPKO Superliga dhe është moment për t’i dhënë një shkelm krizës, që situata të mos precipitojë në një drejtim të pakthyeshëm. Nga ana tjetër, “Skifterët”, edhe pse renditen në vend të katërt me 28 pikë, e kanë të qartë se situata mund të përmbyset shumë shpejt në renditje nëse nuk ruhet vazhdimësia e rezultateve pozitive.
Sot, ora 13:30
Drita – Drenica
Ferizaj – KF Ballkani
Liria – Gjilani
E shtunë, ora 13:30
Kek-U – KF Feronikeli
KF Llapi – Prishtina
Flamurtari – Trepca 89 (Ora 17:00)
