Në IPKO Superligën e Kosovës, këtë të shtunë, zhvillohen dy ndeshjet e radhës për javën e katërt, me protagoniste në fushë dy skuadrat kampione në dy edicionet e fundit, Drita dhe Feronikeli, që do të përplasen në orën 16:00, në qytetin e Gjilanin.
Në tri javët e para të dy ekipet kanë marrë të njëjtat rezultate, 2 fitore dhe një humbje. “Intelektualët” renditen një pozicion më lart falë golaverazhit më të mirë (7-1) dhe po të mos kishin zhgënjyer në takimin hapës me Ferizajn, sot do të ishin me pikë të plota në krye.
Në bazë të paraqitjeve të deritashme, Drita e Feronikeli janë vlerësuar skuadrat kryesore të këtij edicioni. Për këtë arsye përplasja e sotme konsiderohet dhe një sfidë direkte mes pretendentëve.
Takimi tjetër në IPKO Superligën e Kosovës do të zhvillohen në Skënderaj, por në orën 16:00, mes Drenicës vendëse dhe Gjilanit. Skuadra e drejtuar nga vlonjati Gentian Mezani ka marrë dy fitore radhazi në fushën e Ferizaj dhe me Vushtrrinë brenda, duke “harruar” shumë shpejt disfatën në premierën e kampionatit në Mitrovicë me Trepçen ’89.
Pikërisht kjo ndeshje në transfertë me Drenicën do të jetë një provë e fortë për të kuptuar nëse Gjilani ka kapacitetet e duhura për të qenë mes skuadrave pretendente.