Shqipëria U-21 i mbylli eliminatoret e Europianit në vendin e 5-të në Grupin 2 në kuotën e 7 pikëve. Tashmë përfaqësueses Shpresa të drejtuar nga Alban bushi nuk i mbetet gjë tjetër veçse të shohë përpara dhe të punojë për sfidat e së ardhmes. Kështu kuqezinjtë kanë programuar 2 ndeshje miqësore kundër Maltës. E para do të luhet këtë të premte, në stadiumin “Selman Stermasi”, në orën 19:00, ndërsa sfida tjetër në “Loro Boriçi”, më datë 19:00 nëntor, në të njëjtin orar.
Vlen për t’u theksuar fakti që për këto dy ndeshje hyrja në stadium do të jetë falas. Në listën e lojtarëve të grumbulluar nga ana e trajnerit Alban Bushi nuk është se ka patur ndryshime të mëdha, por sigurisht që nuk kanë munguar edhe afrimet, me vetë numrin një të stolit që në konferencën për shtyp të para pak ditëve deklaroi se në radhët e ekipit ka afruar futbollistë të cilët kërkon t’i provojë.
Ndeshjet kundër Maltës do t’i shërbejnë trajnerit për të parë më nga afër situatën, ku mund të jetë e nevojshme të ndërhyhet për të përmirësuar diçka në lojën e skuadrës. Këto teste miqësore shërbejnë edhe në kuadër të eliminatoreve të ardhshme. Sa i përket kundërshtarit, kjo do të jetë përballja e dytë me të. E para ka qenë ajo e gushtit të vitit 2009, e fituar në shifrat 2-1 nga ana e maltezëve.