Qatip Osmani dhe Armend Alimi dolën në konferencën për shtyp të Shkëndijës së Tetovës një ditë para përballjes me Sheriffin e Tiraspolit në raundin e dytë të Champions League, që do të transmetohet drejtpërdrejt nga ora 20:15 në SuperSport2. Trajneri dhe kapiteni i kuqezinjve tetovarë u shprehën të bindur për kalimin edhe të këtij raundi, por pa nënvlerësuar forcën e kundërshtarit.
“Kemi analizuar disa ndeshje të Sheriff Tiraspolit, përfshi edhe takimin e fundit që fituan 3-0. Bëhet fjalë për skuadër kualitative. Këtë periudhë kemi punuar me ekipin edhe në aspektin psikologjik, pasi patjetër duhet të nxjerrim mësime nga humbja e fundit në transfertën me The New Saints. Përmes bisedave në grup si dhe individualisht jemi munduar ta kthejmë atmosferën në nivelin e dëshiruar”, – deklaroi trajneri Qatip Osmani.
“Objektivi ynë është të zhvillojmë lojën më të mirë të mundshme, për t’u kthyer sa më shpejt në identitetin e lojës tone, që kemi treguar më herët. E kam thënë çdo herë se si vendas çdo fitore pa marrë parasysh numrin e golave të shënuar është pozitive, është me rëndësi të mos pranojmë gol. Sidomos kundër Sheriff Tiraspolit, që ka sulm shumë të mire. Besoj se jemi të përgatitur që ta ndalim”, – u shpreh kapiteni Armend Alimi.