Futbolli italian do të ristartojë më 13 qershor me gjysmëfinalen e kthimit mes Napolit dhe Interit, ndërsa portieri kolumbian i skuadrës së Gattusos, David Ospina u shfaq mjaft optimist dhe i kënaqur që futbolli do të rifillojë.
Në një intervistë të dhënë për radion napolitane “Kiss Kiss”, Ospina deklaroi se skuadra po punon shumë në aspektin fizik për të qenë gati të përballojë kalendarin e ngjeshur, ndërsa theksoi se Kupa e Italisë është një objektiv i Napolit.
“Jemi shumë të kënaqur që tani kemi një datë për rifillimin e kampionatit. Kemi nisur punën dhe jemi përqendruar shumë në aspektin fizik, pasi duam të jemi gati për këtë fazë mjaft të rëndësishme. Do të nisim me ndeshjen e Kupës dhe kemi një avantazh pas fitores 0-1 në Milano, por duhet të bëjmë kujdes pasi Interi është një ekip që mund të befasojë. Kupa është një objektiv mjaft i rëndësishëm për ne, ndaj duam ta ngremë këtë trofe, që këtë herë do të luhet në vetëm 4 ditë”, tha Ospina.