Peter Pacult e nisi mjaft mirë aventurën e tij si trajner i Kukësit në Shqipëri, teksa verilindorët morën një fitore 1-3, në një fushë mjaft të vështirë, si ajo e Shkodrës.
“Ishte shumë ndeshje e mirë, sidomos pjesa e parë, që ishte mjaft intensive. Them se e filluam lojën mirë dhe e kontrolluam në vijimësi, ndërsa mbrojtja mbylli mirë hapësirat. Pas avantazhit i lamë kundërshtarët të na bëjnë presion, por nuk u dhuruam shumë hapësira, pasi shënuan një gol aksidental, në goditjen e vetme gjatë 90-minutëshit. Megjithatë, pas barazimit u rikthyem të luajmë mirë dhe shënuam edhe 2 herë, mes shumë rastesh të krijuara. Komplimentoj djemtë e skuadrës, sepse kanë vënë në jetë të gjithë idetë e mia për lojën dhe kanë shpërblyer punën e bërë në përgatitore”, tha Pacult.
Kukësi tregoi një nivel mjaft të mirë, duke qarkulluar topin në mënyrë thuajse perfekte dhe duke mos i lënë aspak hapësira Vllaznisë. Pacult vlerësoi edhe paraqitjen e Shkodrës dhe Musollit, ndërsa tha se klubi është i vëmendshëm edhe në merkato.
“Shkodra është një futbollist mjaft inteligjent, që na ndihmon shumë të qarkullojmë topin, Kam vënë re se ai dhe Musolli, merren vesh mjaft mirë bashkë. Mendoj se kemi një ekip mjaft të mirë, por merkatoja është e hapur dhe jemi të vëmendshëm, në pritje të ndonjë afrimi tjetër”, u shpreh austriaku.
