Antonio Conte është në vitin e fundit të kontratës me Tottenhamin dhe po joshte nga një rikthim në Serinë A, aty ku e pret krahëhapur Juventusi, megjithatë edhe në Londër nuk kanë ndërmend ta lënë të largohet.
Sipas mediave britanike, Daniel Levy është angazhuar personalisht të bindë Conten të qëndrojë në Londër dhe i ka bërë një ofertë që do të jetë shumë e vështirë për t’u refuzuar nga ana e teknikut italian.
Bëhet fjalë për një pagë prej 20 milionë eurosh neto në sezon, me kohëzgjatje të kontratës deri në verën e 2025-ës dhe për më tepër, plot 200 milionë euro buxhet për t’u investuar në merkaton e janarit dhe sidomos të verës së ardhshme.
Në këtë mënyrë Conte do të ketë mundësinë jo vetëm të bëhet trajneri më i paguar, por edhe të marrë lojtarët që dëshiron, për të provuar të fitojë diçka më tepër sesa kampionatet në Angli e Itali.