Ka përfunduar pa fitues kryendeshja e javës në IPKO Superligën e Kosovës, mes Gjilanit dhe Prishtinës, betejë që u fitua nga mbrojtjet dhe portierët, që nuk lejuan topin të përfundonte në rrjetë.
Ky rezultat la të pandryshuar pozicionet e skuadrave në renditje, që tani kanë nga një pikë më shumë, por mund të përfitojë Ballkani, që nëse fiton nesër ndaj Vushtrrisë, mund të shkëputet me 5 pikë nga Gjilani i vendit të dytë.
Fitore surprizë e Flamurtarit të Prishtinës, në transfertën ndaj Llapit të Podujevës, me rezultatin e thellë 1-4. Dy herë Begolli, Kelmendi e Krasniqi shënuan për kuqezinjtë, ndërsa Llapi gjeti golin e nderit me anë të Hysenit.
Zhgënjeu këtë pasdite edhe skuadra tjetër e Gjilanit, Drita, që u mposht me rezultatin 3-1 nga Trepça ’89, në stadiumin “Adem Jashari” të qytetit të Mitrovicës.
Emini e Jashari shënuan për Trepçën që u ndihmua edhe nga një autogol i Cuculit, ndërsa për Dritën shënoi golin e vetëm Fortunato.
