Me 24 orë vonesë, për shkak të problemeve me trajnerin Gjoka në Shkodër, u luajt edhe ndeshja e fundit e javës së 21-të të Superiores, Luftëtari-Vllaznia.
Në një terren të rënduar për shkak të reshjeve të shiut që kishin rënë më herët dhe që shoqëruan gjithë takimin, ishin pikërisht vendasit ata që patën iniciativën.
Gjithsesi, skuadra e Vllaznisë u mbrojt me kujdes dhe e mbylli në barazim pa gola 45-minutëshin e parë. Pjesa e dytë fillon vrullshëm për vendasit, që shpërdorojnë me radhë 5-6 raste të pastra për gol. 3 herë Kristal Abazaj dhe dy të tjera Dejvi Bregu, nuk arrijnë të dërgojnë topin në rrjetën e portierit Sherri.
Vllaznia zgjohet pas minutës së 70’, por e ka të vështirë të futet në zonën e gjirokastritëve, ndërsa Sukaj tenton 3-4 herë nga distance, në mënyrë të dëshpëruar .
Pas vërshëllimës së 3-fishtë të gjyqtarit, sfida mbyllet në barazim pa gola, teksa të dy skuadrat ndajnë nga një pikë. Ky rezultat lë të kënaqur veçanërisht Vllazninë, që prej 3 ndeshjesh radhazi nuk humbet dhe ka marrë 7 pikë të vlefshme për t’i shpëtuar rënies.
