Kupa e Shqipërisë rikthen sot në aksion dy pretendentët për titullin kampion të Superiores, Partizanin dhe Skënderbeun, në fazën e 1/8-ave të Kupës së Shqipërisë. Janë takimet e para zyrtare të 2019-ës, pas përfundimit fazës përgatitore të janarit.
Kështu, të kuqtë do të luajnë në takimin e vajtjes, në orën 14:00, me Kastriotin në Fushë Krujë, ndërsa Skënderbeu do të udhëtojë drejt Lezhës, për t’u përballur me Besëlidhjen. Të dyja këto sfida i përkasin Grupit A. Në fakt, ndeshjet në fjalë u paraprijnë takimeve të tjera të këtij raundi, për faktin se të premten Skënderbeu dhe Partizani do të përplasin brirët në supersfidën e javës së parë të fazës së tretë, që do të luhet në Korçë.
Të mërkurën luhen takimet e mbetura të Kupës, ku spikatin përplasjet Kamza-Vllaznia dhe Tirana – Flamurtari, që do të transmetohen nga SuperSport.
Grupi A
(Sot, ora 14:00)
Kastrioti-Partizani
Besëlidhja-Skënderbeu
(23.01.2019)
Egnatia-Luftëtari
Kamza-Vllaznia
Grupi B
(23.01.2019)
14:00 Apolonia-Kukësi
14:00 Bylis-Laçi
14:00 Lushnja-Teuta
17:00 Tirana-Flamurtari
