Partizani e nis me një fitore bindëse vitin 2019. Të kuqtë hipotekuan kualifikimin në çerekfinalet e Kupës së Shqipërisë falë suksesit me përmbysje me shifrat e thella 2-4 në stadiumin Redi Maloku të Fushë-Krujës përballë Kastriotit, një sfidë që nisi me 15 minuta vonesë për shkak të mungesës së ambulancës. Me një formacion të ndërthurur mes lojtarëve titullarë dhe atyre të stolit, skuadra e Skënder Gegës nuk e nisi shumë mirë ndeshjen teksa në minutën e 13-të u ndëshkua nga Kastrioti. Një supergol i ishit Jurgen Vatnikajt me një goditje fluturimthi i dha epërsinë skuadrës së Bledar Devollit. Me kalimin e minutave terreni u rëndua gjithnjë e më shumë, megjithatë Partizani arriti të përmbyste shifrat brenda pjesës së parë me golat e dy sulmuesve Rubin Hebaj dhe ganezit Mensah. Në pjesën e dytë Partizani realizoi dhe dy herë të tjera fillimisht me Lorenc Trashin dhe më pas me Rubin Hebaj që realizoi golin e dytë personal duke vulosur shifrat në 2-4, pasi në mes të dy golave të skuadrës kryeqytetase qëndronte edhe finalizimi i Shehit për vendasit.
