E enjtja ishte një ditë mjaft intensive për Partizanin e zyrave, teksa brenda pak orësh klubi i kuq ka dhënë 9 njoftime të rëndësishme sa u përket afrimeve të reja, rinovimeve por edhe ndërprerjes së bashkëpunimit me disa lojtarë.
Zyrtarizimi i parë ishte sulmuesi 19-vjeçar, Joseph Ekuban, që vjen i huazuar nga Verona. Ai është vëllai i ish-sulmuesit të Partizanit, Caleb Ekuban, aktualisht pjesë e Trabzonsporit në Turqi.
Pas këtij njoftimi, Partizani zyrtarizoi rinovimin me Egzon Belicën dhe ndarjen me Ardit Hilën. Lajmi i radhës, tejet i rëndësishëm ishte afrimi i sulmuesit Xhamaikan, Brian Brown nga Reno 1868, për të ardhur më pas te firma me portierin Aldo Teqja.
Theofilus Solomon ishte surpriza e radhës e drejtuesit të kuq për tifozët, por nuk 16-herë kampionët në fuqi të Shqipëri nuk do të ndaleshin me kaq.
Në orët e vona të mbrëmjes u zyrtarizua edhe Aristoteles Romero. Mesfushori 23 vjeçar nga Venezuela, i cili është në pronësi të klubit Italian Crotone, mbërrin te kampionët e Shqipërisë me formulën e huazimit për një vit. Romero njëherazi pjesëtar i ekipit përfaqësues të Venezuelës, pritet t’i bashkohet shumë shpejt skuadrës.
Dhe për ta mbyllur ditën plot surpriza, u njoftua në fund ndarja me Lum Rexhepin edhe rinovimi edhe një vit me mbrojtësin Labinot Ibrahimi, i cili është pjesë e Partizanit që nga viti 2013.
