Migjen Basha është emri i ri sugjestionues për merkaton e Partizanit. Të kuqtë janë në kërkim të elementëve cilësorë për të përforcuar sa më shumë skuadrën që do të marrë pjesë në turin e parë kualifikues të UEFA Champions League. Për të nxjerrë në skenë emrin e Migjen Bashës, kanë menduar vetë lojtarët e Partizanit. Lorenc Trashi ka publikuar një foto në profilin e tij në Instagram ku ka dalë sëbashku me Bashën, Hoxhën, Malën dhe Telushin dhe në të cilën i bën thirrje drejtuesve të firmosin me ish lojtarin e Torinos.
Basha ka dhe një vit kontratë me skuadrën greke të Arisit të Selanikut por marrëdhëniet jo të mira me drejtuesit e klubit me shumë gjasa do të sjellin divorcin e parakohëshëm dhe afrimi i tij te Partizani do ishte një goditje e madhe për trajnerin Skënder Gega. Një regjizor si Basha mund t’i shërbejë shumë Partizanit në mesfushë sidomos në ndeshjet europiane, megjithatë problem është paga e tij e lartë pasi 32-vjeçari te Arisi përfiton rreth 300 mijë euro në sezon. Fjalën e fundit nëse lojtari lirohet nga kontrata me Arisin do ta kenë drejtuesit e klubit të kuq pasi pretendimet financiare të Bashës janë vërtetë të larta. Ndërkohë Basha nuk është emri i vetëm që qarkullon në kampin e kuq pasi ekziston edhe mundësia e rikthimit për mesfushorin Ylber Ramadani dhe mbrojtësin Arbnor Fejzullahu, të cilët luajnë respektivisht me Velje në Danimarkë dhe Xamax në Zvicër. Për sulmin Ali Sowe mbetet i preferuari i drejtuesve të kuq por është një objektiv shumë i vështirë për t’u arritur pasi bullgarët e CSKA-së së Sofies e kanë blerë përfundimisht kartonin e tij nga Chievo.
