Pas Skënderbeut, edhe Federata Shqiptare e Futbollit ka reaguar në lidhje me lajmin se inspektorët e UEFA-s, që kanë hetuar dosjen e Skënderbeut, janë kërcënuar me jetë.
Në një komunikatë zyrtare në faqen e FSHF-së në internet, organizmi i futbollit në vend distancohet nga kërcënimet dhe inkurajon hetimin e telefonatave, ndërsa shpreh angazhimin maksimal në luftën kundër ndeshjeve të trukuara.
Ja reagimi i plotë i FSHF-së:
Federata Shqiptare e Futbollit distancohet plotësisht nga ngjarja më e fundit ku persona anonimë kanë cënuar integritetin moral dhe kanë shantazhuar inspektorët e UEFA-s në punën e tyre investigative.
FSHF inkurajon autoritetet policore për të zbardhur deri në fund origjinën e këtyre telefonatave intimiduese dhe të dënueshme. Si në çdo moment, edhe këtë radhë ajo është e gatshme të bashkëpunojë me UEFA-n dhe me autoritetet përkatëse për zbardhjen sa më shpejtë të ngjarjes e cila duhet të vërë përpara përgjegjësisë ligjore autorët.
FSHF shprehet e angazhuar maksimalisht në betejën kundër ndeshjeve të fiksuara. Federata e futbollit mbetet në solidaritet të plotë me UEFA-n në misionin e përbashkët kundër fenomenit të trukimit, duke ofruar çdo potencial të sajin bashkëpunues.Të tillë mekanizma kërcënues kanë vetëm një fund të sigurtë, atë të ndëshkimit nga forca e ligjit.
