Çfarë atmosfere në stadiumin “Fadil Vokrri”, ku Prishtina mori një fitore të madhe ndaj Llapit, duke mbajtur të ndezur garën për titullin kampion në IPKO Superligën e Kosovës. Heroi i bardhekaltërve ndaj llapjanëve rezultoi Mërgim Pefqeli, (u asistua nga Mankenda) që me golin e tij (i vetmi i sfidës) në minutën e 88-të, bëri që të shpërthente festa në impiantin e kryeqytetit, ku kishte një prani të konsiderueshme të tifozëve.
Bën detyrën Feronikeli në sfidën e shtëpisë me Dritën e Gjilanit. Skuadra e Drenasi fitoi thellë 4-1 dhe vazhdon të mbajë kryesimin me 2 pikë më shumë se Prishtina.
Kastriot Rexha shënoi për vendësit në minutën e 33-të, ndërsa Da Silva dyfishoi në fillim të pjesës së dytë. Shaqiri i Gjilanit, me golin e shënuar në të 63-ën, dha përshtypjen se loja u hap, por ndodhi e kundërta, pasi Feronikeli realizoi edhe dy gola të tjerë me autorë Fazliun dhe Hotin. Me renditjen aktuale (72 Feronikeli dhe 70 Prishtina) titulli pritet të vendoset në javën e fundit, në superduelin Feronikeli-Prishtina.
Takimi tjetër mes Lirisë dhe KEK-ut, që kishte vetëm, vlerë statistikore, pasi të dyja skuadrat kanë rënë zyrtarisht nga kategoria, përfundoi me fitoren 3-1 të prizrenasve.