Rafael Nadal nuk fal as bullgarin Grigor Dimitrov. Spanjolli konfirmoi momentin e shkëlqyer që po kalon, teksa pas suksesit në Us Open siguroi edhe kualifikimin në finalen e turneut 500 pikësh që po zhvillohet aktualisht në kryeqytetin e Kinës, Pekin.
2-1 me sete në favor të numrit 1 të Botës përfundoi gjysmëfinalja e parë e turneut aziatik, me Rafën që tashmë do të ketë edhe një pengesë të fundit për të kaluar dhe për të përmbushur të gjitha pritshmëritë, pasi ai është favoriti i madh për suksesin final në Pekin. Nadal mbylli llogaritë me Dimitrov në 2 orë e 19 minuta lojë, me shifrat 6-3 4-6 6-1.
