Kroacia është një shtet me afro 4 milionë banorë dhe pak vite më parë shkroi historinë, me kombëtaren kroate që u shpall nënkampione në Kupën e Botës, Rusi 2018.
Një brez i jashtëzakonshëm lojtarësh dhe kjo vërtetohet edhe me një fakt shumë interesant, pasi në 10 edicionet e fundit të UEFA Champions League, skuadrat fituese kanë pasur të paktën një kroat në skuadër.
Në 2012-2013, Kroacia u krenua me Mandzukic (Bayern Munich), ndërsa në edicionin pasardhës ishte radha për Luka Modric (Real Madrid).
Në sezonin 2014-2015 ishte momenti i Ivan Rakitic (Barcelona), ndërsa në tre sezonet e radhës, 2015-2016, 2016-2017 dhe 2017-2018 në “fronin” e Europës u ngjit përsëri Luka Modric, me mesfushorin i cili kishte në skuadër edhe bashkëatdhetarin Mateo Kovacic (Real Madrid).
Ne edicionin pasues, 2018-2019, flamurin kroat e përfaqësoi mbrojtësi Dejan Lovren (Liverpool), ndërkohë në 2019-2020 ishte radha e Ivan Perisic (Bayern Munich).
Edicionin e kaluar në “majën” e Europës u rikthye Mateo Kovacic (Chelsea), ndërsa në fund, pak ditë më parë, Luka Modric (Real Madrid) triumfoi për herë të pestë në karrierën e tij në Champions League.