Tek Interi nuk është vetëm çështja “Icardi” që duhet zgjidhur, pasi ashtu siç raporton e përditshmja italiane “La gazzetta dello Sport”, Interi duhet t’i kushtojë vëmendje tashmë edhe çështjes së kroatit IvanPerisic. 29-vjeçari nuk është duke përjetuar një periudhë të mirë këtë sezon, ndaj largimi i tij është i mundshëm, aq më tepër tani që është kthyer për të interesi i klubeve të mëdha europiane nga Premier League dhe nga La Liga.
Konkretisht, shërbimet e tij kërkohen nga Manchester United dhe Atletico Madrid. Ende nuk ka patur asnjë ofertë zyrtare, por nëse Interi e mendonte që të mos privohej nga kroati deri verën e ardhshme, tashmë strategjitë në drejtim të Perisicit duket sikur ndryshojnë duke projektuar largimin e tij që në këtë sesion të merkatos. Klubet e mëdha europiane janë gati të ofrojnë plot 40 milionë euro për kartonin e tij dhe, nëse Perisic do të niset brenda 31 janarit, kohë në të cilën mbyllet dhe merkatoja dimërore, zikaltrit duhet të mendojnë për zëvendësuesin e tij. Objektiv mbetet Chiesa i Fiorentinës, ndërkohë që pëlqehet nga drejtuesit edhe Bergwijn i Psv dhe Martial, që në të vërtetë sapo ka rinovuar me United.