Rezultoi thjesht një “meteor”, që magjepsi pranishmit në “Alliazn Arena”, goli i Milot Rashicës në minutën e 24-t, në takimin me Bayernin, pasi Werder Bremeni u fik fill pas mrekullisë së futbollistit “dardan”, duke pësuar 6 gola të njëpasnjëshëm për rezultatin përfundimtar 6-1.
Pas “perlës” se Rashicës, që thuajse la të palëvizur portierin Manuel Neuer (mesfushori shqiptar mori një top në mesfushë dhe dribloi edhe Boatengun, para se të tundte rrjetën), realizuan Coutinho (tregolës), Lewandowski (dygolësh) dhe Muller.
Fitore e thellë edhe për Borussian e Dortmundit 0-4 në fushën e Mainzit. Reus u dha epërsinë verdhezinjve në pjesën e parë, ndërsa në fraksionin e dytë e gjetën rrjetën edhe Sancho, Hazard dhe Schulz.
Në takimet e tjera Paderboni barazoi 1-1 me Union Berlinin (Gjasula, 90 minuta në fushë), Kolni iu imponua 2-0 Bayer Leverkusenit, ndërsa Hertha Berlin – Freiburg u mbyll 1-0.
