Mbrojtësi i Feronikelit, Përparim Islami, i nënshtrohet me sukses ndërhyrjes kirurgjikale në gju. Ai u dëmtua rëndë në ndeshje gjysmëfinale të Digitalb Kupës së Kosovës përballë Ballkanit, takim që u zhvillua të mërkurën në Suharekë.
27-vjeçari këtë të shtunë kreu operacionin në ligamentet e këmbës së djathtë dhe tani pret të nisë fazën e riaftësimit për t’u kthyer sa më parë të jetë e mundur në fushë. Në një postim në rrjetet sociale, Islami shkruan:
“Sapo mbarova operacionin dhe çdo gjë shkoi mirë, faleminderit Zotit! Tani fillon pjesa më e vështirë e rikuperimit… Edhe duhet shumë, shumë punë. Sigurisht mua nuk më mungon puna dhe vullneti për të punuar, sepse çdo gjë që kam arritur deri sot e kam arritur me punë, me djersë edhe sakrificë. Ju falënderoj të gjithëve për mbështetjen dhe interesimin që keni treguar për mua, ju dua shumë! Së shpejti jam gati!”
