Connect with us

Hi, what are you looking for?

La Liga

Pesë muaj pa fitore në transfertë, Barçën e pret një sezon i vështirë

Pas humbjes 2-0 që pësoi në stadiumin “Nuevo Los Carmenes” të Granadës, Barcelona mbeti në kuotën e 7 pikëve pas 5 javëve të para në Primera Division dhe tani gjërat janë më se të qarta, pasi ky është starti më i dobët i Barçës në çerek shekulli. Për herë të fundit në kampionatin spanjoll me një rendiment të tillë skuadra blaugrana është parë përpara 25 vjetësh, më saktë në sezonin 1994-95, kur ekipi drejtohej nga i madhi Johan Cruyff.

Diçka duket sikur është thyer në mbrëmjen e 7 majit, pikërisht në humbjen e turpshme që skuadra katalanase pësoi në “Anfield Road” nga Liverpuli, pasi që nga ajo kohë Barça është shfaqur vërtet me shumë probleme. Tani është fakt që ekipi i drejtuar nga Ernesto Valverde është duke vuajtur shumë në ndeshjet larg stadiumit “Camp Nou”.

Larg tempullit katalanas kjo skuadër është shfaqur tepër e brishtë dhe mezi njihet. Në Andaluzi Barcelona pësoi humbjen e dytë sezonale në kampionat, pas disfatës së pësuar në Bilbao si dhe barazimit 2-2 me Osasunën në Pamplona. Ekipi katalanas tashmë fut ujë në prapavijë, ndërsa përpara skuadra duket si e fjetur dhe është vërtet shumë larg ritmit të saj të zakonshëm.

Në këtë mënyrë Barcelona humbet për momentin kontaktin me kreun, gjithsesi bën përshtypje fakti që skuadra shfaqet e parrezikshme jashtë fushës, madje edhe në një rast si ai i ditës së shtunë, kur ekipi blaugrana pati në formacion në pjesën e dytë edhe katër lojtarë si Messi, Suarez, Griezmann apo dhe 16-vjeçari Ansu Fati.

Fillimisht Ernesto Valverde befasoi duke mbajtur në stol Messin, sidomos pasi ylli argjentinas u rikthye për të luajtur në mesjavë në Dortmund me Borussian, duke preferuar për ta nisur takimin me kanteranin Carles Perez. Trajneri bask befasoi edhe me zgjedhjet në mesin e fushës ku i dha besim dyshes Rakitiç-Sergi Roberto, në vend të binomit Busquets-Arthur, ndërsa në mbrojtje në vend të Jordi Albës së dëmtuar iu dha hapësirë mbrojtësit të ardhur nga Betisi, Junior Firpo.

Ishte pikërisht 23-vjeçari me origjinë domenikane që gaboi që në start, e për pasojë Barça e nisi sfidën në disavantazh pas vetëm 63 sekondash lojë. Në pjesën e dytë Valverde provoi gjithçka duke luajtur pra me katër sulmues dhe pas pësimit të golit të dytë me 11-metërsh trajneri bask nxori përpara gjithashtu edhe qendërmbrojtësin Pique, duke e mbyllur Granadën në 16 metrat e fundit, gjithsesi skuadra e përfundoi ndeshjen në mënyrë të shëmtuar pa shënuar fare dhe mes vërshëllimave të shumta të fansave blaugrana.

Me disfatën e pësuar në Andaluzi bëhen plot pesë muaj pa fitore larg Katalonjës, më saktë që nga 23 prilli, kur ekipi fitoi 2-0 në “Mendizorroza” me Deportivo Alaveshin. Duke shtuar natyrisht edhe përballjen e humbur me Valencian në stadiumin “Benito Villamarin”, në finalen e Kupës së Mbretit, në 8 ndeshjet jashtë fushe Barça numëron 4 humbje dhe vetëm 4 barazime. Larg stadiumit “Camp Nou” skuadra blaugrana ka shënuar vetëm 2 gola gjithsej në katër ndeshjet e këtij sezoni, ku sigurisht përfshihet edhe dueli i Dortmundit.

Duke lënë mënjanë sfidën me Osasunën, pra Barcelona nuk ka shënuar në 3 ndeshjet e tjera dhe sulmuesi i ri Antoine Griezmann që kushtoi plot 120 milionë euro nuk ka gjuajtur ende asnjëherë në kuadrat në takimet jashtë fushe të këtij sezoni. Luis Suarez u rikthye në fushë vetëm javën e kaluar, ndërsa Mesi akoma nuk ka startuar një ndeshje si titullar, pa harruar gjithashtu faktin që ekipi është duke luajtur edhe pa sulmuesin tjetër Ousmane Dembele, që u dëmtua që në takimin hapës me Athletic Bilbaon, ndërsa Frenkie de Jong duket një hije e shëmtuar e futbollisti që ishte te Ajaksi i Amsterdamit.

Barcelona vërtet ka fituar 4 nga 5 kampionatet e fundit në Spanjë, por gjithsesi në Primera Division në edicionin e ri skuadra e Valverdes ka pësuar dy disfata që në start, kur gjithë sezonin e kaluar formacioni katalanas pësoi vetëm 3 humbje gjithsej. Pas humbjes me Liverpulin Barça ka fituar vetëm 3 nga 9 ndeshjet kompetitive që ka zhvilluar, ndërkaq me 9 gola të pësuar në 5 ndeshjet e para në kampionat ekipi i Valverdes përfaqëson klubin më të ndëshkuar në mbrojtje, me të njëjtën kuotë golash të pësuar sa edhe Betisi me Espanjolin.

Humbja me Romën u duk e rastësishme, ndërsa disfata në “Anfield Road” me Liverpulin kuptohet qartë që ka lënë pasoja të pariparueshme. Drejtuesit i dhanë besim Valverdes, vendim që la vërtet të shtangur edhe vetë kapitenin Leo Messi. Ylli argjentinas ishte autori i të vetmes gjuajtjeje në portë të Barcelonës në gjithë ndeshjen me Granadën, madje edhe ajo u regjistrua në minutën e 82-të të sfidës, për më tepër edhe ndaj Borussias, Barça e gjeti vetëm një herë kuadratin.

Pas humbjes me Granadën ekipi fluturoi menjëherë drejt Barcelonës, ndërsa ditën e diel skuadra u ndëshkua me seancë stërvitore. Për momentin fajet i ka marrë përsipër që të gjitha Valverde, sidoqoftë fjalët e sulmuesit uruguaian Luiz Suarez, menjëherë pas ndeshjes, tashmë rëndojnë vërtet shumë: Barça duhet të bëhet gati për një sezon sa të gjatë, aq edhe të vështirë.

Lajme të tjera

Futboll

Maroku po përgatitet për të ndërtuar stadiumin më të madh në botë. Bëhet fjalë për një impiant futuristik, që dhe do të jetë ndër...

Kombëtare

Nga Stokholmi në Madrid. Trajneri Sylvinho nuk humb kohë aspak dhe fill pas miqësores Suedi-Shqipëri, ka fluturuar drejt kryeqytetit spanjoll për të ndjekur live...

Legjionarët

Napoli i dashuruar me shqiptarët. Pas Amir Rrahmanit, që është shndërruar në një shtyllë të mbrojtjes, klubi napolitan synon të sjellë në “Diego Armando...

Kombëtare

Armando Broja do të jetë zgjedhja e parë për Europianin. Mendon kështu gazetari dhe komentatori i mirënjohur, Ylli Aga, që në emisionin “Kuqezi” në...