11 gola të pësuar vetëm në dy ndeshjet e fundit dhe 4 humbje në kampionat në 5 ndeshje të zhvilluara në pak më shumë se një muaj. Werder Bremeni, ku luan Milot Rashica, në krizë te thellë rezultatesh. Pas humbjes tenistike (6-1) me Bayernin, skuadra e drejtuar nga Kohfeldt merr një tjetër shuplakë nga Mainzi, që e shkatërroi 0-5 brenda në “Weserstadion”
Një skuadër që ka humbur busullën ajo e Werderit, që pësoi 4 gola vetëm në pjesë e parë me autorë Quaison, i cili e gjeti plot tri herë rrjetën, dhe Pavlenkan, që shënoi në portën e tij.
Makthi për skuadrën e Rashicës (luajti titullar) vijoi edhe në pjesën e dytë, me Manzin që realizoi edhe të pestin me Matetan, pak para se të mbyllej koha e rregullt. Me këtë ritëm humbjesh Werder Bremeni rrezikon seriozisht të rrëshqasë në zonën e ftohtë, pasi renditet në vendin e 15-të me vetëm 12 pikë.
