Fjalëpak dhe konciz. I tillë u prezantua në konferencën për shtyp Krzysztof Piatek, që zyrtarisht është pjesë e klubit kuqezi të Milanit, duke plotësuar pritshmëritë e atyre që e njohin nga afër. Një djalë modest, i rezervuar, të cilit nuk i interesojnë deklaratat bombastike, pasi punën e tij kërkon ta tregojë në fushën e blertë.
Në konferencën për shtyp, i ulur pranë Leonardos dhe Maldinit, Kris, ashtu siç e thërrasin shokët e skuadrës, mbylli kalimin e tij në Milanello, që duhet thënë ndodhi me shpejtësi rrufeje për të zëvendësuar të larguarin Higuain. Tashmë misioni polakut Piatek është të ndihmojë organikën e Gattusos që të orientohet drejt Champions League-s falë golave të tij. Një objektiv të cilin vetë sulmuesi e ka prioritet.
“Kam besuar gjithnjë tek aftësitë e mia, dëshiroja të tregoja më të mirën time në Serinë A. Sa për Milanin tashmë e dinë të gjithë që kam qenë tifoz i kësaj skuadre. Që në fëmijëri ëndrra ime ishte të luaja me këtë fanellë, ndaj të jem sot i pranishëm këtu pranë këtyre legjendave të këtij klubi është një nder dhe emocion i veçantë për mua. Gjithsesi, këtë do të mundohem ta tregoj më mirë në fushë.
Piatek do të mbajë veshur fanellën me numrin 19 dhe është Leonardo që shpjegon arsyet e një zgjedhjeje të tillë.
“Vetë Piatek zgjodhi fanellën me numrin 9, por për momentin kjo fanellë duhet fituar, sepse është e një peshe dhe rëndësie të veçantë. Ndaj vendosëm t’i jepnim numrin 19”.
Piatek është i vetëdijshëm se prania e tij në Milano është falë argjentinasit Higuain, por është i gatshëm për të mbajtur peshën dhe rolin e tij në këtë skuadër.
“Më pyesni nëse jam gati për të mbajtur veshur fanellën e Milanit? Unë mund t’ju përgjigjem se kam lindur gati dhe do të bëj gjithçka mundem duke dhënë kontributin tim drejt objektivit Champions. Është ky synimi im parësor.”