Sebino Plaku në dyshim për të vijuar karrierën në Superiore ose në Norvegji. 33-vjeçari, autor i 13 golave këtë edicion me Kamzën është përfolur shumë në këtë periudhë si përforcim i disa ekipeve. Megjithatë vetë sulmuesi do të niset të shtunën drejt Norvegjisë për të kaluar pushimet dhe gjasat janë që qëndrimi i tij në vendin skandinav të zgjatet më shumë. Vetë lojtari ka bërë të ditur për Supersport se ka një opsion për të vijuar atje karrierën e tij, teksa Norvegjia nuk është e panjohur për të. Në 2008-ën Sebino Plaku luajti për Ham Kam, një aventurë e shkurtër në të cilën nuk la shumë gjurmë. Megjithatë situata është ndryshe, futbollisti është më i pjekur pas aventurave në Poloni me Slask si dhe aktivizimin dhe fitimin e titujve kampion me Skënderbeun. Edicioni i fundit me Kamzën konfirmoi cilësitë e lojtari i cili mesa duket ka shtuar fansat edhe jashtë kampionatit shqiptar pavarësisht moshës së tij. Kukësi dhe Kastrioti ishin emrat e parë që dolën në skenë për shërbimet e tij ndërkohë që drejtuesit e Kamzës kanë bërë të ditur se goleadori dhe kapiteni i tyre do të vijojë të jetë pjesë e skuadrës edhe për edicionin e ri. Tashmë Plaku ka shtuar admiruesit e tij dhe vera pritet të jetë shumë e nxehtë për të, me skuadrat të vendosura në radhë për shërbimet e sulmuesit.