Gjilani ia doli të “skuqë” derbin e Anamoravës, duke fituar me meritë me rezultatin 2-0 pasditen e sotme dhe duke bërë vërtetë spektakolare garën për titullin kampion, kur kanë mbetur edhe dy javë nga fundi.
Skuadra e drejtuar nga Gentian Mezani arriti të shënojë golin e vetëm të ndeshjes me anë të sulmuesit veteran Sebino Plaku, i cili në minutën e 54-t shfrytëzoi mjaft mirë një asist spektakolar të Franc Veliut dhe arriti të dërgojë sferën në rrjetë.
Drita u përpoq të reagojë dhe krijoi disa mundësi të mira shënimi, ku më flagranti ishte ai i Namanit, që gjuajti mbi traversë një top që i erdhi pak metra larg portës, ndërsa në minutat shtesë Gjilani gjeti edhe golin e sigurisë.
Ishte një kundërsulm i shpejtë i “të kuqve” që u nisën në sulm me Prognin, i cili hyri në zonë dhe priti ardhjen e Shalës të cilin e shërbeu saktë dhe ky i fundit gjuajti me të djathtën, duke thyer për herë të dytë portierin Faton Maloku.
Me këtë 3-pikësh Gjilani mori vendin e dytë të renditjes me vetëm një pikë më pak se Drita dhe një më shumë se Ballkani, duke bërë që gara treshe për titull të jetë plotësisht e hapur dhe mjaft interesante në dy javët e mbetura.
Mjaft spektakolare ishte edhe përballja tjetër për kreun në Suharekë, mes Ballkanit vendas dhe Prishtinës së Armend Dallkut, ndërsa në fund të dy skuadrat u detyruan të ndajnë nga një pikë, pasi nuk shkuan më shumë se barazimi 2-2.
Ballkani kaloi në avantazh me golin e shënuar nga Blend Baftiu në minutën e 12’, por vetëm pak çaste më vonë Prishtina fitoi një 11-mtërsh me Mankendën, të cilin e shndërroi në gol Krasniqi, duke rikthyer baraspeshën.
Në minutat e fundit të pjesës së parë, Ballkani e rriti presingun dhe arriti të gjejë golin e avantazhit me anë të mesfushorit 28-vjeçar Kushtrim Gashi, duke shkuar në dhomat e zhveshjes me rezultatin 2-1.
Prishtina e nisi pjesën e dytë me një tjetër qasje dhe pas disa aksioneve të mira, ishte sulmuesi Otto John që shënoi golin e 9 personal prej janarit me fanellën e kryeqytetasve dhe riktheu edhe njëherë baraspeshën në rezultat.
Deri në vërshëllimën finale të dy skuadrat krijuan një mori rastesh për të shënuar golin e fitores, por nuk ia dolën dhe u detyruan të marrin vetëm nga një pikë, ndërsa me këtë barazim Prishtina del plotësisht nga gara për titullin kampion.
Nuk i vlen shumë barazimi as Ballkanit, që ndonëse mbetet vetëm dy pikë larg Dritës kryesuese, ka në dy javët e mbetura përballjen me të dy skuadrat e qytetit të Gjilanit, ndaj rikuperimi do të jetë shumë i vështirë.
Sa u përket sfidave të tjera, Ferizaj u mposht në shtëpi me rezultatin e thellë 0-4 nga Dukagjini dhe iu bashkua zyrtarisht këtyre të fundit e Vushtrrisë në rrugën për në Kategorinë e Parë, pasi ra edhe matematikisht.
Bëri detyrën edhe Drenica, që mposhti me përmbysje 2-1 Vushtrrinë, ndërsa Trepça ’89 mbajti gjallë shpresat për mbijetesë, pasi triumfoi 5-4 përballë Llapit në një sfidë vërtetë spektakolare dhe të bukur për t’u parë.
Miqtë nga Podujeva kaluan të parët në avantazh, ndërsa Trepça përmbysi gjithçka që në pjesën e parë, duke çuar shifrat në 3-1 dhe duke dhënë idenë se llogaritë e ndeshjes ishin mbyllur tashmë. Megjithatë Llapi nuk u dorëzua dhe arriti të shënojë tre gola në pjesën e dytë, duke marrë edhe njëherë avantazhin.
Gjithsesi minutat shtesë ishin vendimtare për fatin e takimit, pasi Trepça ’89 arriti të shënojë dy herë dhe të përmbysë gjithçka, duke marrë një fitore 5-4, që i mban gjallë shpresat për të mbijetuar mes më të mirëve të futbollit në Kosovë.