Jose Mourinho është duke monitoruar situatën te Tottenhami në një periudhë kur po mendon rikthimin e tij në krye të një skuadre të rëndësishme.
Mourinho ka mbetur pa punë që kur u shkarkua nga Manchester United dhjetorin e kaluar, kur i kishte mbetur më pak se një vit në kontratë, e cila do të skadonte në vitin 2020.
Skuadra londineze mbetet një alternativë për trajnerin portugez, sikurse Reali i Madridit, që drejtohet nga Zinedine Zidane. Mourinho, 56 vjeç, po pret mundësinë ideale për të rinisur sa më parë punën si trajner. Kohet e fundit ai ka punuar kryesisht si opinionist, teksa para se të niste sezoni iu bashkua Sky-t.
Ai ka refuzuar ofertat nga ish-klubi i tij, Benfica dhe një propozim prej 90 milionë paundësh nga skuadra e Superligës Kineze, Guangzhou Evergrande.
“Duhet të jem i durueshëm dhe të pres mundësinë e duhur dhe mundësia e duhur është ajo që është në të njëjtën madhësi dhe në të njëjtin nivel me mua si trajner. Më duhet të pres për ofertën e duhur,” – ka deklaruar pak kohë më parë Mourinho.
Fillimi zhgënjyes i sezonit nga Tottenhami ka hedhur dyshime mbi të ardhmen e Mauricio Pochettinos.
Klubi nuk ka plan të shkarkojë Pochettinon, i cili ka qenë në krye që nga viti 2014. Marrëveshja aktuali e argjentinasit është e vlefshme deri në vitin 2023. Ai gjithashtu ka një klauzolë largimi prej 32 milionë paundësh, që as Manchester United dhe as Real Madridi nuk janë të gatshëm të paguajnë.