Dinamo mposhti me rezultatin 4-0, Besëlidhjen në javën e pestë të Kategorisë së Parë. Blutë e kryeqytetit nuk e vendosën për asnjë moment në diskutim suksesin ndaj lezhjanëve teksa në stadiumin Selman Stermasi mbi të tjerët shkëlqeu Taulant Marku.
Sulmuesi realizoi një tregolësh me serinë e golave që nisi në minutën e 39-të të pjesës së parë, ndërsa pas tre minutave, Marku goditi përsëri për ta mbyllur pjesën e parë në avantazhin e dy golave për Dinamon.
Në fraksionin e dytë, Marku sërish gjeti rrugën e rrjetës në minutën e 71 ndërsa në limitet e ndeshjes, Ersil Ymeri thelloi edhe më shumë shifrat për t’i fiksuar ato në 4-0. Pas këtij trepikëshi, Dinamo është në vend të parë me 11 pikë, ndërsa nga ana tjetër, Besëlidhja mbetet e parafundit në klasifikim me vetëm katër pikë.